Монгол Улсын эдийн засаг элгээрээ мөлхөж, цормоороо эвхэгдэж байгааг илчлэх томоохон үзүүлэлт бол “үнийн өсөлт”. Баяраас баярт, өрийн дарамттай, манай улсын иргэдийн ахуй амьдралын бодит дүрийг гудамжаар алхах төдий шууд анзаарагдаж байна.  

Тодруулбал Үндэсний стастикийн хорооноос мэдээлснээр Улаанбаатар хотод гуравдугаар сарын зургааны өдрийн байдлаар хүнсний барааны үнэ өмнөх сараас 2.2 хувь, өмнөх долоо хоногоос 1,4 хувиар өссөн. Өнгөрсөн хоёрдугаар сарын 27-ны өдөр хонины ястай мах 1кг нь 12120 төгрөг байсан бол өнөөдөр 3.5 хувиар өсч,12546 төгрөгт хүрсэн байна. Харин өнгөрсөн хоёрдугаар сарын 27-ны өдөр үхрийн ястай мах нэг килограм нь 14480 төгрөгийн үнэтэй байсан бол өдгөө 2.3 хувиар өсч, 14819 төгрөгөөр худалдаалагдаж байна.  

Дээрхи үзүүлэлтээс харахад үнийн өсөлтөд хоёр болоод гуравдугаар сард тохиолддог шил дараалсан баяруудын үр нөлөө өндөр байх ажээ.  Нэг үгээр хэлбэл баярын өдрүүдийг тохиолдуулан хүнсний барааны үнэ огцом өсч, аргаа барсан иргэд өрийн дэвтэрт оочирлож байна.