Монгол Улсын Засгийн газар НҮБ-ын Хүүхдийн Сангийн 2023 оны хамтын ажиллагааны төлөвлөгөөнд талууд өнөөдөр гарын үсэг зурлаа.

Энэ төлөвлөгөөнд бага насны хүүхдийн цогц хөгжил, сургуулийн өмнөх болон бага, суурь боловсрол, хоол шим тэжээл, өсвөр үе, цахим шилжилт зэрэг чиглэлээр 22 ажлыг зохион байгуулахаар тусгасан юм.

Мөн ЮНИСЕФ-ийн Монгол дахь суурин төлөөлөгч Эваристэ Комлан Хүүхдийн сангаас эрхлэн бэлтгэсэн аудио хичээлийн дээжийг Боловсрол, Шинжлэх Ухааны сайдад гардууллаа. Нийт 90 аудио хичээл боловсруулж, 2021 онд 1,300 хүүхдэд, 2022 онд 2,500 хүүхдэд аудио хичээлийг тоглуулагч төхөөрөмж, гарын авлагын хамт хүлээлгэж өгсөн. Энэ оны нэгдүгээр сард өвөлжилт хүндэрсэн 10 аймагт 4,000 ширхэг дуу тоглуулагч төхөөрөмж хүргэжээ.

Энэ өдрүүдэд ЮНИСЕФ-ийн Глобал инновацын албаны захирал Томас Дэвидсон Монгол Улсад ажлын айлчлал хийж байна. Тэрбээр хэд хэдэн цэцэрлэг, сургуульд зочилж боловсролын салбарын өнөөгийн байдал, тэр тусмаа цахим шилжилттэй танилцжээ. Энэ уулзалтын үеэр БШУ-ы сайд Л.Энх-Амгалан Монгол улсын цахим шилжилтийн талаар мэдээлэл өгч санал солилцлоо.