Нийслэлийн Иргэдийн Төлөөлөгчдийн Хурлын ээлжит чуулганд Боловсрол, Шинжлэх Ухааны сайд Л.Энх-Амгалан боловсролын салбарын хүртээмж, нөхцөл байдлын талаар мэдээлэл өгч байна. 

Энэ үеэр НИТХ-ын төлөөлөгч Г.Гангамөрөн "Цэцэрлэгийн хүүхдийн хоолны мөнгө өдрийн 2,745 төгрөг байна. Өдөрт таван удаа цай, хоол хүүхдүүдэд өгөхөд энэ мөнгөөр хүргэх нь хүнд. Иймд ямар шийдэл байж болох вэ" хэмээн асуув. 

Уг асуултад сайд Л.Энх-Амгалан "Сургууль, цэцэрлэгийн хоолыг хариуцдаг төрийн өмчит дөрвөн компани бий. Үүнийг эргэж харахгүй бол болохгүй байна. Өөрийн гал тогоотой сургууль ховор бөгөөд хүүхэд авах ёстой калорынхоо 40 хүрэхгүй хувийг л авч байна.

Цэцэрлэгийн хүүхдийн хоолны мөнгийг эцэг, эхтэй нь хуваалцдаг байсан тогтолцоо саяхныг хүртэл байсан. Иймд ирэх есдүгээр сарын 1-нээс сургуулийн өмнөх боловсролын байгууллагын хоолны зардлын тодорхой хувийг эцэг, эхээр нь төлүүлэх тогтолцоонд шилжих нь зүйтэй гэж байгаа" хэмээв.