ШУТИС-ийн оюутнуудын хиймэл оюун ухаанаар бүтээсэн төхөөрөмжийг Япон улс дөрвөн тэрбум төгрөгөөр үнэлж, батламж олгосныг Боловсрол шинжлэх ухааны сайд Л.Энх-Амгалан мэдээллээ. 

Тодруулбал, өнгөрсөн дөрөвдүгээр сарын 27, 28 өдрүүдэд Япон улсын Токио хотод “DCON 2023” хиймэл оюун ухаанаар төхөөрөмж бүтээх олон улсын тэмцээн болсон юм. Тус тэмцээнд Монгол Улсын ШУТИС-ийн Коосэн технологийн коллежийн гурван оюутан багшийн хамт “Хөдөлмөрийн аюулгүй байдлыг хангуулах” санаагаар өөрсдийн хийсэн бүтээлээ дөрвөн тэрбум төгрөгөөр үнэлүүлж, батламж гарджээ. 

Япон улсаас зохион байгуулж буй хиймэл оюун ухаанаар төхөөрөмж бүтээх тэмцээнд анх удаа гадаад баг оролцож, анх удаа гадаад хүн японоор илтгэл тавьсан үйл явдал болов.

“Safe focus” багт гурван оюутан, нэг багш байдаг. Оюутнуудын хувьд Д.Төгсбилэг, Б.Ганчимэг нар Коосэн технологийн коллежийн Цахилгаан электроникийн 4-р курсэд харин М.Анударь өдгөө гуравдугаар курсэд суралцаж байна.

Тэдний хувьд Монгол Улсад инженер, технологийн салбарын уралдаан тэмцээн цөөн болдог тул өөрсдийгөө сорьж үзэхээр гаднын тэмцээн уралдааныг сонирхож, оролцохоор бэлдэж эхлэхдээ баг болж, санаагаа ч олоод мэргэжлийн багш Ж.Цанжидхүүгийн тусламжтайгаар хиймэл оюун ухаант төхөөрөмж бүтээсэн аж.