УИХ-ын Байгаль орчин хүнс хөдөө аж ахуйн байнгын хорооны хуралдаанаар өнөөдөр /2023.10.03/ өвөлжилтийн бэлтгэл ажил болон намрын ургац хураалтын явцын талаарх Хүнс, хөдөө аж ахуй, хөнгөн үйлдвэрийн сайдын мэдээллийг сонссон байна.

Энэ үеэр гишүүд салбарын сайдаас асуулт асууж, хариулт авах үеэр өвөлжилт хүндэрч магадгүй аймгууд болон өвс тэжээлийн талаар яригдав.

Гэвч салбар хариуцсан сайд болох ХХААХҮ-ийн сайд Х.Болорчулуун “Би мэдэхгүй. Өвс тэжээлийн хөнгөлөлт гэж байхгүй, зах зээлийн зарчмаар явна. Өвс тэжээлийн нөөц бүрдүүлэх асуудал Шадар сайдын хамаарлын ажил. Шадар сайд тодорхой тоон мэдээлэл өгөх байх” гэсэн мэдээллийг хэлэв.

Угтаа салбарын сайд нь өвс тэжээлээ бэлдэх хийгээд малчдын өвөлжилтийн асуудалд нэг номерт гүйж байх хүн баймаар. Гэвч тэрээр өөрийгөө хамааралгүй хүн мэтээр ярив.