Бүгд нүүрсний хулгай, нууц гэрээгээр баригдсан төмөр зам руу өчигдөр анхаарлаа хандуулж байх зуурт Ерөнхий сайд Л.Оюун-Эрдэнэ, Худалдаа хөгжлийн банкны ТУЗ-ын дарга Д.Эрдэнэбилэг нар тохиролцоонд хүрсний үр дүн гарлаа. Сүүлийн үед  Д.Эрдэнэбилэгийг Ерөнхий сайдтай тохиролцоонд хүрч байж болзошгүй талаар яриа дэгдээд байсан. Тэгвэл шүүх дээр нэгэн сонирхолтой шийдвэр гарлаа. Тодруулбал, Д.Эрдэнэбат нарт холбогдох 20 хүн, 2 хуулийн этгээдэд холбогдох эрүүгийн хэргийн шүүхийн урьдчилсан хэлэлцүүлгээр Худалдаа хөгжлийн банкны ТУЗ-ийн дарга Д.Эрдэнэбилэг, Ерөнхий сайд асан Ч.Сайханбилэг зэрэг Монгол Улсаас оргон зайлсан этгээдүүдийн эзгүйд Эрдэнэтийн 49 хувь, Хөтөл, Дарханы төмөрлөгийн үйлдвэртэй холбоотой хэргийг шүүхээр шийдэх боломжгүй гэж үзжээ. Ингэснээр шүүхээс уг хэргийг прокурор, АТГ-т буцаав.

Өөрөөр хэлбэл,барьж явсан махаа чанаж дуусгалгүй хаясантай ижилхэн процесс өрнөсөн гэсэн үг. Сонирхуулахад “Сахал” Д.Эрдэнэбилэг энэ оны нэгдүгээр сард Сингапур улсад 14 хоног эмчлүүлэхийн тулд 3 тэрбум төгрөгийн барьцаа тавьж шүүхээс хилийн хоригоо цуцлуулсан. Ингээд хил гарсан цагаасаа хойш өнөөдрийг хүртэл 11 сарын хугацаанд эргэж орж ирээгүй. Мөн Ерөнхий сайд асан Ч.Сайханбилэг 2018 онд Монголоос гарч, эргэж ирээгүй учраас оргон зайлсан этгээдүүдийн жагсаалтад ороод байгаа.