Соёлын сайд Ч.Номин Соёлын өвийн төвийн захирал Г.Энхбатыг Монголын үндэсний музейн захирлаар давхар томилжээ. Салбарын сайд захирлын албанд томилох сонгон шалгаруулалт зарлалгүйгээр өөр байгууллагын захирлаар энэ албыг хавсран удирдуулахаар шийдвэрлэсэн байна. Тодруулбал, өнгөрсөн 2023 оны арваннэгдүгээр сард Монголын үндэсний музейн хамт олон захирлын түр орлон гүйцэтгэгчээр доктор (Ph.D) Д.Мөнхтогоог  томилсон байна. Энэ хүсэлтээ Соёлын сайд Ч.Номинд хүргүүлэхэд түр орлон гүйцэтгэгчийг сэлгэн тушаал гаргажээ. Гэвч Соёлын сайд Ч.Номин хоёр өөр статустай соёлын байгууллагын захирлын албан тушаал дээр нэг хүн томилж хавсран гүйцэтгүүлэх тушаал гаргасныг музейн ажилчид эсэргүүцэж байгаа юм.  Салбарын сайдын энэ үйлдэл нь байгууллага хоорондын албан харилцаа доголдох, хяналтын чиг үүрэг алдагдах, улмаар соёлын өвийн эсрэг хэрэг зөрчил гаргах нөхцөлийг үүсгэх магадлалтай болж байгааг музейн ажилчид нь хэлж байна.