Монголын үндэсний допингийн эсрэг байгууллага /МОНАДА/ сүүлийн жилүүдэд барцад ихтэй байгаа . Өнгөрөгч тэргүүнээ сольсон ч асуудлын тар нь дуусаагүй байгаа юм.  Тодруулбал, Ж.Хатанбаатар 2017 онд Монголын үндэсний допингийн эсрэг байгууллага ТББ-ыг байгуулахдаа удирдах зөвлөлийн нэр бүхий гишүүдийн гарын үсгийг хуурамчаар зурж, хууль бусаар чөлөөлсөн  гэх гомдлыг Авилгатай тэмцэх газар шалгаж, Шүүх шинжилгээний үндэсний хүрээлэнгээс гарын үсгийн шинжээчийн дүгнэлт гарсан байна.
Уг дүгнэлтийн дагуу Улсын бүртгэлийн ерөнхий газар зохих шалгалтыг хийж, 2024 оны хоёрдугаар сарын 20-ны өдрийн шийдвэрээр уг байгууллагатай холбоотой 2017 оноос хойшхи  бүх бүртгэлийг хүчингүй болгожээ. Өөрөөр хэлбэл, ТББ-ын нэр сольсон, тэргүүн томилсон, удирдах зөвлөл өөрчилсөн болон допингийн шинжилгээний сорьц цуглуулсан зэрэг бүх үйл ажиллагааг хүчингүй болгосон аж. Дээрх шийдвэрийг шинэ тэргүүн Ц.Уугангэрэл нарын удирдах зөвлөлийн зарим гишүүд эсэргүүцэж, шүүхэд гомдол гаргажээ. Түүнчлэн  “МОНАДА”-ийн захиргааны актын биелэлтийг түдгэлзүүлэхээр хөөцөлдөж байгаа талаар албаны эх сурвалжууд мэдээлж байна. 
МОНАДА-ийн үйл ажиллагаа, бүртгэл, шийдвэрийг хүчингүй болговол допингийн маргаан ахин дэгдэж, эсрэгээрээ допингоор шийтгүүлсэн бөхчүүд дэвжээндээ эргэн ирэх боломжтой. Өөрөөр хэлбэл одоогийн допингд холбогдсон бөхчүүд эрхгүй байгууллага тэдний шинжилгээний сорьцыг цуглуулсан гэж гомдол гарган ялалт байгуулах талтай. Тиймээс гомдол гаргаж, түдгэлзүүлэхээр одоогийн удирдлага нь ажиллаж байгаа гэнэ.
Нөгөө талд МОНАДА хүчингүй болвол Монгол Улс олимпод орж чадах уу гэх асуултыг иргэд хөндөх болсон. Тэгвэл энэ талаар санаа зовох шаардлагагүй аж. WADA буюу Дэлхийн допингийн эсрэг байгууллагаас баталсан  “Гарын үсэг зурагчдыг дүрэмд нийцүүлэх” олон улсын стандарт гэж бий. Гарын үсэг зурагч гэдэг нь Монгол Улсын хувьд Үндэсний олимпийн хороо, Үндэсний паралимпийн хороо, Үндэсний допингийн эсрэг байгууллагыг хэлдэг. Яг энэ цоорхойг ашиглан допингтой бөхчүүд эргэн ирэлт хийх магадлалтай гэсэн үг .