Олон нийтийн сүлжээнд хүний эрхийг хамгаалах хуулийн талаар иргэдийн бухимдал дээд цэгтээ хүрч, өөр өөрсдийн хэмжээнд эсэргүүцсээр байгаа. Эрх баригч нам  Шүгэл үлээгчийн тухай хуулийг баталж, хэрэгжүүлчихээд шүгэл үлээх гэхээр ийнхүү хоолойг боомилж байгаад сөрөг хүчин АН мөн эгдүүцээд эхэлжээ. Энэ талаар АН-аас  мэдээлэл хийн, хуульд хориг тавих шаардлагыг Ерөнхийлөгчид тавихаас гадна Үндсэн хуулийн Цэцэд хандахаа мэдэгдлээ. Хэрвээ энэ хуулийг хэрэгжүүлж эхэлбэл  Цахим хөгжил харилцаа холбооны сайд Н.Учрал болон ЗГХЭГ-ын дарга, Ерөнхий сайдыг огцрохыг хатуу шаардана гэлээ. Энэ талаар АН-ын дэд дарга Б.Ган-Очир:  

Олон нийтийн сүлжээнд хүний эрхийг хамгаалах хуулийг хэрэгжүүлж эхлэхээр эрх баригчид хүссэн үедээ бидний амыг цахим орчинд барина. Цахим хөгжлийн сайд Н.Учрал У.Хүрэлсүх Ерөнхийлөгчид зориулж, энэ хуулийг батлуулсан. Олон нийтийн сүлжээнд хүний эрхийг хамгаалах хуулийн дагуу бүх коммент, троллыг даръя гэсэн захиалга явсан. Мөн хаврын жагсаал цуглааны үеэр цахим орчныг хаана. Ерөнхийлөгч У.Хүрэлсүх ард түмнийхээ талд байгаа гэдгээ харуулж, хориг тавьсан ч даанч хожимдсон. Хуулийг аль хэдийнэ баталчихсан. Цэцэд хандсан ч шийдэж өгч чадахгүй. Сонгууль дөхөхөөр  хүссэн хаягаа хаана. Сонгуульд зориулж гаргасан энэ хууль хүний эрхийг уландаа гишгэж байна” гэлээ.