Монголын төмөр замчдын үйлдвэрчний эвлэлээс төмөр замд тээврийн хулгайгаас гадна авлига, албан тушаалын хэрэг  гаарсан талаар тус байгууллагын Үйлдвэрчний эвлэл мэдээлэл хийж, Зам тээврийн хөгжлийн сайд С.Бямбацогтод шаардлага хүргүүлэн, хариугаа нэхсээр байгаа билээ. Тодруулбал, шаардлагын эхэнд  Улаанбаатар төмөр зам хувь нийлүүлсэн нийгэмлэг нь ОХУ болон Монгол Улсын хувь нийлүүлсэн оролцоотой байгууллага. Тиймээс засаглалыг ОХУ ерөнхийдөө хариуцан Монголын талаас гурав, гурван хүний төлөөлөлтэй ерөнхий хороо ажилладаг. Гэвч тэнд улс төрийн шахаагаар хүмүүсийг томилдог. Тухайлбал, “шилэн” Цогоо буюу Б.Цогтгэрэл тус хороонд багтдаг. Тиймээс томилгоо эргэж харах. Бид хэдэн жилийн өмнөөс вагон зараад байна гэж шүгэл үлээсэн ч хариуцсан дарга нар нь мэдэхгүй гээд сууж байдаг. Тиймээс төмөр замын авлигыг гэмт хэргүүдийг яаралтай шалгаж, буруутай албан тушаалтнуудад хариуцлага тооцох. Дараагийн асуудал нь, УБТЗ ХНН-ийн нийт ажилчдын цалингийн гэрээг шинэчлэх. Мөнгөний ханшийн уналтыг цалинтайгаа дүйцүүлэх шаардлагатай. Түүнчлэн ажилчдыг ялгаварлан гадуурхах, ажлын байрны дарамт их байгаа тул үүнийг яаралтай шийдэх зэргийг шаардлагадаа тусгасан байдаг.
 

Тэгвэл С.Бямбацогт сайд “Төмөр замчдад тулгамдаж буй асуудлыг шат дараатай шийдвэрлэж, үүсээд буй авлига албан тушаалын хэрэгтэй тэмцэнэ” гэдгээ мэдэгджээ. Мөн бусад шаардлагыг ч хүлээн авлаа. Энэ талаарх дорвитой ажлыг ойрын хугацаанд хийнэ гэжээ.