Монгол Улсын Ерөнхий сайд Л.Оюун-Эрдэнэ БНСУ-ын Ерөнхий сайдын урилгаар энэ өдрүүдэд тус улсад айлчилж буй. Харин Монгол Улсын Ерөнхий сайдын айлчлалтай холбоотойгоор БНСУ-д ажиллаж, амьдарч буй монголчууд жагсаал зохион байгуулахаар болжээ. Тэд гадаад оюутнуудын дагалдан виз болох нөхөр, хүүхдийнх нь визийг Монгол Улс дахь БНСУ-ын ЭСЯ асуудалгүй өгдөг болох, дагалдан визэд БНСУ-д ажиллах эрхийг нь өгөх, БНСУ-д хавдрын улмаас эмчлүүлж байгаа өвчтөний эмнэлгийн төлбөрийн дарамтаас чөлөөлөхөд тусалж, хандив гуйх, гадаадад суралцаж, амьдарч буй монголчуудад тулгамдаж буй асуудлаар дуу хоолойгоо хүргэхээр болсон байна. 

Монгол иргэдийн өнөөдөр тулгарч буй гол хүндрэл нь БНСУ-д хоёрдугаар сарын 1-нээс гуравдугаар сарын 31-ныг хүртэл хууль бусаар амьдарч байгаа иргэдийг баривчлан буцааж эхэлсэн. Албан ажил, ар гэрээс нь шууд баривчлан буцааж байгаа тул Тэгү хотод  байгаа монгол иргэд эсэргүүцэн дээрх жагсаалд нэгдэхээр болсон байна. Тэд БНСУ-ын Засгийн газраас иргэдийг баривчлах ажлаа зогсоохыг шаардаж буй аж. 

Жагсаалд оролцогчид хамгийн гол нь эмх журмыг сахихыг хүсэж, тодорхой шаардлагыг тавьжээ. Үүнд, 

- Монгол Улсын иргэн байх (БНСУ-ын иргэн болсон эсвэл давхар иргэншилтэй иргэд оролцохгүй),
- Ерөнхий сайдад хэлэх үгээ А4 цаас дээр монгол хэлээр бичиж ирэх болон өөрөө ирж амжихгүй тохиолдолд бусдаар дамжуулж өгөх,
- Жагсаалын үеэр архи, тамхи, мансууруулах бодис хэрэглэхгүй байх,
- Уриа, лоозон бэлдэж ирэх,Солонгос улсын эмнэлгийн төлбөрийн дарамтад байгаа өвчтөний ар гэрийнхэн зөвхөн хандив гуйх,
- Цуглаанд оролцох хүсэлтэй хүмүүс 010-8605-9196 утас руу зөвхөн мессеж илгээн бүртгүүлсний дагуу өдөр, цагийг мэдэгдэх юм байна.