“Зөвлөлдөж шийдье” зөвлөлдөх санал асуулгын талаар УИХ дахь МАН-ын бүлгийн дарга Д.Тогтохсүрэн тэргүүтэй Ажлын хэсгийн гишүүд мэдээлэл хийлээ. Энэ үеэр УИХ дахь МАН-ын бүлгийн дарга Д.Тогтохсүрэн "Цахим сүлжээгээр Үндсэн хуулийг бүхэлд нь өөрчлөх гэж байна. Тэр тусмаа Үндсэн хуульд байгаа тусгаар тогтнолтой холбоотой томоохон асуудлыг Үндсэн хуульд нэмэлт өөрчлөлт оруулах байдлаар хасах нь гэсэн мэдээлэл явна. УИХ-ын дарга өчигдөр олон нийтэд хандсан. Зөвлөлдөх зөвлөлийн хэлэлцэх асуудал, сэдэвт Шинэ Үндсэн хууль хэлэлцэхтэй холбоотой асуудал огт байхгүй. Зөвлөлдөх асуулгад Монгол Улсын нийгэм, эдийн засаг, улс төрийн нөхцөл байдалд тулгамдаад байгаа дөрвөн том асуудлын хүрээнд л ярина. Нэгдүгээрт, иргэний болон улс төрийн эрхтэй холбоотой асуудал. Хоёрдугаарт, парламентын ардчиллын асуудал, мөн эдийн засаг, баялгийн сан, төвлөрлийн сан гэх мэт. Н.Энхбаяр даргын боловсруулсан хуулийн төслийг УИХ хэлэлцэж, батлах гэж байна гэдэг мэдээллийг зохион байгуулалттайгаар тарааж байгаад албан ёсоор хариу өгье гэж бодсон юм" гэв.