МУСГЗ, яруу найрагч Ц.Хуланг гадаадын тагнуулын байгууллагатай хамтран ажилласан хэрэгт буруутган баривчлан саатуулсан нь гэнэтийн цочмог үйл явдал болсон. Өнөөдрийг хүртэл иргэд итгэхгүй эргэлзэж тээнэгэлзсэн хэвээр байгаа юм. Харин Тагнуулын ерөнхий газраас Ц.Хуланг таван жилийн турш мөрдөж ирсэн байдаг.

Нийслэлийн Прокурорын газраас яллагдагч Ц.Хуланд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн хоёрдахь хэсэгт заасан үндэслэлээр цагдан хорих таслан сэргийлэх арга хэмжээ авах тухай саналыг 2023 оны нэгдүгээр сарын 19-ний 15:00 цагт Сүхбаатар дүүргийн Эрүүгийн хэргийн анхан шатны шүүхэд ирүүлсэн байдаг.

Харин шүүх уг асуудлыг хэлэлцэн Ц.Хуланг нэгдүгээр сарын 20-ны өдрөөс эхлэн нэг сарын хугацаанд цагдан хорих, таслан сэргийлэх арга хэмжээ авахаар шийдвэрлэсэн юм. Энэ хугацаа Сар шинийн өмнөхөн буюу Битүүний өдөр дуусгавар болох юм. Ц.Хулангийн өмгөөлөгч, ар гэрийнхэн нь батлан даалтад гаргах хүсэлтийг шүүхэд удаа дараа тавьж байгаа ч хүнд зүйл ангитай хэрэг учраас хэмээн татгалзаж байгаа сурагтай байна.

Яруу найрагч Ц.Хуланг Тагнуулын ерөнхий газрын Мөрдөн шалгах газраас Эрүүгийн хуулийн 19.4 дүгээр зүйлийн 1 дэх хэсгийг үндэслэн яллагдагчаар татсан юм.

Эрүүгийн хууль

19.4 дүгээр зүйл. Гадаадын тагнуулын алба, байгууллага, иргэнтэй хууль бусаар хамтран ажиллах

1. Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс арван таван жил хүртэл хугацаагаар хорих ял шийтгэнэ.