Ерөнхий сайд Л.Оюун-Эрдэнэ өөрийн бүрэн эрхийнхээ хүрээнд албан тушаалын томилгоо хийсэн ийм нэгэн явдал өчигдөр тохиолоо.

Барилга хот байгуулалтын сайдаар Ц.Даваасүрэн, Эрүүл мэндийн сайдаар С.Чинзориг, Боомтын сайдаар Х.Булгантуяа, Шадар сайдаар Ч.Хүрэлбаатар нар томилогдсон бөгөөд тэд өргөсөн тангарагтаа үнэнч байж, төр түмнийхээ төлөө хоёргүй сэтгэлээр зүтгэх болов.

Улс орны байдал ороо бусгаа энэ цагт шинэ уур амьсгал, шинэ салхи хэрэгтэй байгаа. Гагцхүү эдгээр томилогдсон  эрхмүүд ажил үүргээ хэрхэн ухамсарлаж буйг ажиглаж суух эрх бидэнд үлдлээ. Иргэдийн оролцоогүй Засгийн газрын сонголтгүй сонгууль ийм л хууль эрх зүйн тогтолцоотой. 

Өнгөрсөн сарын иргэдийн жагсаалаас эхлээд өчигдөр,өнөөдрөөр үргэлжлэх хүндхэн нөхцөл байдал тэдэнд цочроо өгснийх үү? Тэд ажил үүргээ ухамсарлаж, бодлогын шинэ систем нэвтрүүлж байна уу? Ирж байгаа цаг хугацааны эрхээр түмэн асуултын учир зангилаа тайлагдах болно.

Шинэ үе буюу Ерөнхий сайдын ээлжит нүүдэл

Өчигдөр буюу нэгдүгээр сарын дөрвөнд БОАЖ-ын дэд сайдаар “Тавантолгой түлш” ТӨХК-ийн гүйцэтгэх захирал асан М.Ганбаатар, ЭЗХ-ийн дэд сайдаар БОАЖ-ын дэд сайд Г.Түвдэндорж, Эрүүл мэндийн дэд сайдаар С.Энхболд, Цахим хөгж, харилцаа холбооны дэд сайдаар Ж.Эрхэмбаатар, УУХҮ-ийн дэд сайдаар О.Цэндсүрэн нарыг томилсон юм.

Ийнхүү Монгол Улсын Засгийн газар бүрэн бүрэлдэхүүнээрээ ажиллаж эхэллээ. Гүйцэтгэх засаглал 16 яамнаас гадна Засгийн газрын хэрэг эрхлэх газар, Түгжрэлийг бууруулах үндэсний хороо, Спорт, Олимпизм хариуцсан нийт 19 сайдтайгаар ирэх он жилүүдэд ажиллах болсон юм.