Орчин үеийн К-под охидын хамтлагуудаас хамгийн амжилттай яваа нь “Black Pink” гэдэгтэй маргах хүн ховор биз ээ. Тэгвэл тус хамтлагийн дуунууд хөгжмийн стриминг платформ болох Spotify дээр хүмүүсийн хамгийн их сонссон охидын хамтлаг болж, Гиннессийн рекорд тогтоожээ. Энэ талаар Black Pink хамтлагийн агентлаг болох “YG” энтертайнмент Бямба гарагт мэдээлсэн байна. Тодруулбал, энэ оны гуравдугаар сарын 3-ны байдлаар тэдний дууг Spotify дээр 8.88 тэрбум удаа сонсжээ. Ингэснээр Английн Little Mix хамтлагийн тогтоосон 8.4 тэрбумын амжилтыг эвдэж байгаа юм. Түүнчлэн Black Pink хамтлагийн хоёр дахь бүрэн хэмжээний цомгийн гол дуу болох “Shut Down” нь Spotify- ийн долоо хоногийн шилдэг дууны жагсаалтыг тэргүүлснээр энэ амжилтад хүрсэн анхны К-поп хамтлаг болсон байна. Black Pink хамтлаг нь тус платформ дээр 38 сая дагагчтай ба YouTube дээр ч мөн хамгийн их дагагчтай уран бүтээлч гэж явдаг юм. Ийнхүү Black Pink хамтлаг 20 дахь удаагаа Гиннессийн амжилтыг эвджээ.