“Улаанбаатар” олон улсын медиа урлагийн наадмыг ирэх тавдугаар сарын 23-30-нд найм дахь удаагаа зохион байгуулна. Өнөө жилийн наадмыг “Монтаж” хэмээх сэдвийн дор зохиохоор болжээ.
Технологи асар хурдтай хувьсан хөгжсөөр буй өнөөгийн нийгэмд хүмүүн бид медиагаас бүхий л төрлийн мэдээллийг авах болсон ч тэрхүү мэдээллээр нэгдэхийн оронд хамгийн эгэл, өдөр тутмын зүйлс дээр ч бие биеэсээ тусгаарлагдсаар байна. Ертөнцийг хүлээн авах сэрэл мэдрэмж ч эрс хувьсаж, байгаа, байхгүйн зааг бүдгэрч, технологи, хүн төрөлхтний харилцан хамаарал оршихуйг тодорхойлох болсоор багагүй хугацаа өнгөрчээ. Иймд энэ удаагийн наадмын голлох үзэл санааг “монтаж” буюу эвлүүлэг хэмээх үгээр төлөөлүүлж, үндэстний онцлог, итгэл үнэмшил, сүсэг бишрэл, газар зүй болон байгалийн тогтоц зэргийн тусгал бидний өдөр тутмын амьдралд хэрхэн бууж, дэлхий дахины амьдралын нийтлэг хэв төрхийг бүтээж буйг илэрхийлэхийг зорино.
Нүдэнд үл үзэгдэх мэдээллийн ертөнц, бодит ертөнц, цахим ертөнц сүлэлдсэн энэ орчинд хүн гэдэг код мэт. “Жинхэнэ” нийгэм, “жинхэнэ” бодит байдал үгүй болж байна уу. Ер нь бодит байдал гээч бий юу гэдгийг уран бүтээлүүдээр харуулах нь энэ жилийн “Улаанбаатар” мелиа урлагийн наадмын онцлог аж.