Улаанбаатар хотод үйл ажиллагаа явуулж буй соёл, урлагийн сургуулиуд болон сургалтын төвүүдийн нэгдсэн өдөрлөгийг дөрөвдүгээр сарын 10, 11-нд Д.Сүхбаатарын төв талбайд зохион байгуулахаар төлөвлөсөн. Гэвч цаг агаарын нөхцөл байдлаас шалтгаалан түр хойшилж, дөрөвдүгээр сарын 12, 13-нд хийхээр боллоо.

Өдөрлөгт Соёл, Урлагийн Их Сургууль, Монгол Улсын Консерватори, Кино Урлагийн Дээд Сургууль, СИТИ дээд сургууль зэрэг соёл, урлагийн чиглэлийн мэргэжлийн боловсрол олгодог 20 орчим сургууль, сургалтын төвүүд хамтран оролцоно. Энэ үеэр сургуулиуд үйл ажиллагааныхаа талаар мэдээлэл өгч, элсэлтийн шалгалтын бүртгэл хийх бөгөөд урлагийн тоглолт зохион байгуулах юм.

Нийслэлийн иргэд, хүүхэд, залуучуудад соёл, урлагийн үзвэр, үйлчилгээг нээлттэй, хүртээмжтэй хүргэх, соёл, урлагаар дамжуулан соён гэгээрүүлэх, боловсрол, мэдлэг түгээж, их хотын ирээдүйн соёлтой иргэнийг бэлтгэх зорилгоор тус өдөрлөгийг зохион байгуулж буй хэмээн Нийслэлийн Соёл, Урлагийн Газраас мэдээлэв.