Нэрт хөгжмийн зохиолч Исаак Дунаевскийн нэрэмжит олон улсын дуулаачдын XII уралдаан тун удахгуй Москва хотноо болох аж.

Уг уралдаанд Монголын дуучид өнгөрсөн жилээс оролцож эхэлсэн бөгөөд тэргүүн байрын шагнал хүртсэн юм. Улсын филармонийн гоцлол дуучин, СТА Б.Дэлгэрбаяр гурван номинацид тэргүүн байр эзэлж, Гран при хүртэж, Монголын дуучдын амжилтын салхийг хагалж өгсөн бол энэ жилийн уралдаанд хоёрдугаар шатанд тунаж үлдсэн уран бүтээлчдийг өнөөдөр албан ёсоор зарлалаа.

Тэд ирэх сарын 15-23-ны өдрүүдэд бусад орны дуулаачидтай Оросын хөгжмийн зохиолчдын ордны тайзнаа гарах гэж байна.

Манай уран бүтээлчид Хөдөлмөрийн баатар, Чингис хаан одонт, Төрийн шагналт, Урлагийн гавьяат зүтгэлтэн, хөгжмийн нэрт зохиолч  Бямбасүрэнгийн Шаравын Монголын төдийгүй дэлхийн хөгжмийн сан хөмрөгт орсон бүтээлүүдийг эх хэлнээ эгшиглүүлэхээр боллоо.