Цагдаа, хууль хүчнийхэн салбарынхаа сайдыг хүртэл сумлачих юм. Ноцтой хэргийн мэдээлэл хийхэд хүргэж, нөгөөх нь үсэрч гарч ирэн “УБТЗ-ийн орлогч дарга С.Батдөлийг тансаг хауснаас нь баривчиллаа. 48 цагийн хугацаатай саатуулсан. Гэрээс нь ам,доллар, евро, монгол төгрөг нийлсэн 7,3 тэрбумыг хураан авсан” хэмээн сүр дуулиантайгаар мэдэгдсэн билээ. 
Гэтэл удалгүй С.Батдөлийг огтхон ч хориогүй болж таарч, Улсын дээд шүүх “С.Батдөлийг шүүхийн зөвшөөрөлгүй сэжигтнээр баривчилсан тухай баримт прокурорын санал болон хавтаст хэрэгт байхгүй. Шүүхийн хэлэлцүүлэгт шүүгч прокуророос энэ талаар тодруулахад, сэжигтнээр баривчлаагүй гэсэн тайлбарыг гаргасан болно” хэмээн мэдэгдлээ. 
Хуулийн байгууллагуудын тэс зөрүүтэй энэхүү мэдээлэл тус газрууд ямархан уялдаа холбоотой ажилладгийг төвөггүй илтгэнэ. Цагдаа нар сайдаа түлхэж, нөгөөх нь яаран гарч ирж мэдээлэл хийнэ. Араас нь шүүх, прокурор нь С.Батдөл гэгчийг цагдан хорих зөвшөөрөл өгөөгүй. Тийм баримт алга хэмээн сөргүүлэх. 
Ийн олныг төөрөгдүүлсэн мэдээлэл сая л бодит болж, Баянгол дүүргийн шүүхээс С.Батдөлийг нэг сар цагдан хорих шийдвэрийг дөнгөж сая гаргалаа.