Монгол Улсын Соёлын Яам, Монголын Урчуудын Эвлэлийн Хороо хамтран зохион байгуулж буй Улаанбаатар ART WEEK “Дүрслэх урлагийн долоо хоног” үзэсгэлэн нээлээ.

Гурав дахь удаагаа зохиогдож буй тус арга хэмжээнд нийт 150 гаруй бүтээлчээс өнөө цагийн монголын дүрслэх урлагийн өнгө төрхийг тодорхойлж яваа бүтээлчдийн үе үеийн төлөөлөл 43 уран бүтээлчийн бүтээлийг толилуулах юм.

Уг үзэсгэлэн нь тавдугаар сарын 24-өөс 31-ний хооронд Хүнс, хөдөө аж ахуй, хөнгөн үйлдвэрийн судалгаа хөгжлийн төвд болно.

Жил бүрийн тавдугаар сарыг Дүрслэх Урлагийн сар болгон зарласан. Энэ удаагийн ART WEEK үзэсгэлэн нь шинэ залуу үеийнхэнд Монголын дүрслэх урлагийн томоохон уран бүтээлчдийн бүтээлийг таниулах ач холбогдолтойн дээр энэ төрлийн арга хэмжээнүүд нь төрөлх хотоо урлагаар дамжуулан гадна дотнынхонд сурталчлах, соёлын аялал жуулчлалын нэг хэлбэр болон өргөжих боломжтой том ажил, агуулгын эхлэл.