Египетийн шигшээ баг ба “Ливерпуль” клубийн довтлогч Мохамед Салах бэртлийн улмаас 21-28 хоногийн хугацаанд талбайд гарахгүй гэж хөлбөмбөгчний бие төлөөлөгч Рами Аббас мэдэгдлээ.

Өдгөө 31 настай М.Салах Африкийн цомын тэмцээний Египет-Ганын шигшээ багуудын хэсгийн тоглолтын /2:2/ үеэр гэмтэл авч, нэгдүгээр үеийн төгсгөлд талбайг орхижээ.  Булчингийн гэмтлийн улмаас тэрбээр Египетийн багийн дараагийн хоёр тоглолтыг өнжих болсон тухай зарим хэвлэлд бичсэн байна.   

“Мохамедын авсан бэртэл нь бидний бодож байснаас илүү хүнд байна. Иймээс тэрбээр зөвхөн хоёр тоглолт өнжих бус харин ойрын 21-28 хоногийн хугацаанд эмчлүүлэх шаардлагатай. Их Британид эрчимтэй эмчилгээ хийлгэж, формондоо орсон даруйдаа багтаа буцан ирж, Африкийн цомд оролцох боломж бий” хэмээн Р.Аббас Х нийгмийн сүлжээний хуудсандаа бичжээ.

М.Салах энэ улиралд “Ливерпуль”-ийн бүрэлдэхүүнд 27 тоглолтод оролцохдоо 18 гоол оруулж, 9 оновчтой дамжуулалт хийсэн байна.