Өчигдөр /2024.03.14/ Төрийн ордонд “Улаанбаатар-Бүсчилсэн хөгжил” чуулганыг НЗДТГ зохион байгууллаа. 
ЗҮҮН ХОЙД АЗИЙН ХОТЫН ДАРГА НАРЫН ЧУУЛГА УУЛЗАЛТ БОЛОН ОЛОН УЛСЫН ИННОВАЦИ ҮЗЭСГЭЛЭН АРГА ХЭМЖЭЭГ НИЙТ НЭГ ТЭРБУМААР ХИЙНЭ
Тэгвэл тус чуулганыг нэг тэрбум төгрөгөөр зохион байгуулж, татвар төлөгчдийн мөнгийг үр дүнгүй үрсэн мөн хурлын дараа "Шангрилла" зочид буудалд тансаг зэрэглэлийн хүлээн авалт хийсэн гэх иргэдийн шүүмжлэл бий. Тодруулбал,  чуулганыг зохион байгуулахын тулд Төрийн ордны нэг давхрын угтах хэсэгт хивс дэвсэж, анонс байрлуулсан зэрэг тохижилтын ажилд 50-60 сая төгрөг, 1000 оролцогчийн хоолны зардалд 94 сая төгрөг, Их танхимын түрээсэнд 7.5 сая төгрөг, гарын бэлэгт 40 сая төгрөг зарцуулсан талаар зарим иргэд мэдээлсэн.  Мөн хуралд оролцогчдын зарим нь чуулганы дараах Шангрилла зочид буудлын хүлээн авалтыг эсэргүүцэж, шүүмжилсэн. Тэгвэл тус чуулганыг зохион байгуулах төсвийг өнгөрсөн сард НИТХ-аар батласан Нийслэлийн 2024 оны төсвийн тодотголд тусгаж өгсөн байна.
Төсвийн тодотголд “Засгийн газрын 2023 оны 481 дүгээр тогтоолоор 2024 оныг “Нийслэл Улаанбаатар хот-Хөгжлийн бүс”-ийн форум арга хэмжээг зохион байгуулахаар төлөвлөсөн бөгөөд уг арга хэмжээнд 1 тэрбум төгрөг” хэмээн бичжээ.