Монгол улсад сүүлийн жилүүдэд нэмэгдэх болсон тэмбүү өвчин хүндрэхээрээ мэдрэл болон нүдэнд нөлөөлж буй тохиолдол илэрчээ. Энэ өвчнөөр өвчилсөн иргэд тоохгүй хаях, эмчилгээгээ дундаас нь цалгардуулах зэрэг нь хүндрэх шалтгаан болдог байна. 

Тэмбүү өвчний халдвар авснаа хэрхэн мэдэх вэ?

Халдвар авснаас хойш 3-4 долоо хоногийн дараа бэлэг эрхтэн болон түүний ойролцоо хатуу яр гарах нь хамгийн анхны шинж тэмдэг юм. Хатуу яр нь 1-1,5 см хэмжээтэй. Зарим тохиолдолд үүнээс ч том улаан өнгөтэй байж болдог байна. Энэ шинж тэмдгийг анзааралгүй явсаар иргэд хүндрэх үе шат руу оруулдаг. Хүндэрсэн тохиолдолд нүд, дотор эрхтэн зэрэг өвчлөх магадлал нь өндөр болдог байна.

Манай улсын хувьд тэмбүү өвчнөөр өвчлөгсдийн тоо жилээс жилд өсөж байна. Өнгөрсөн онд арван мянга гаруй хүн бэлгийн замын ямар нэгэн халдварт өвчинтэй гэж оношлогдсоноос тэмбүү өвчний халдвар 41 хувийг эзэлжээ.  Одоогоор өвчин нь хүндэрч нүд болон мэдрэлийн тэмбүү туссан иргэдийн тоо тийм их биш ч эмчилгээ дутуу хийлгэсэн, оношлогдоогүй удаан явсан тохиолдолд хүндрэх эрсдэлтэйг эмч нар анхааруулж байна.