Засгийн газрын өчигдрийн хуралдаанаар танхимын тэргүүн зарим нэгэн томилгоог хийж, Эрүүл мэндийн сайд С.Энхболдод хариуцлага тооцон огцруулж, Төрийн нарийн бичгийн дарга нарыг сэлгэн томилно гэж байв. МАН,АН-ын нөхөд С.Энхболд сайдыг ганц энэ удаагийнх бус олон удаагийн хариуцлагын асуудал яригдлаа хэмээн шахалт үзүүлсэн ч үлдэж чадлаа хэмээж байлаа. Харамсалтай нь, үлдэх бус орных нь томилгоон дээр МАН санал нэгдэж чадаагүйгээс өчигдөр эцэслэн шийдвэр гаргаж чадаагүй байна.
Харин өнөөдрөөс Засгийн газрын бүрэлдэхүүнд өөрчлөлт орж, зарим нэгэн сайд нарыг ажлаас нь чөлөөлөхөөр яригдаж байна. Тодруулбал, Эрүүл мэндийн сайд С.Энхболдын оронд УИХ-ын гишүүн С.Чинзориг, Барилга, хот байгуулалтын сайд Б.Мөнхбаатарын оронд УИХ-ын гишүүн Ц.Даваасүрэн,  албан тушаалынх нь төлөө марафон өрнөөд байгаа Боомтын сайдад Г.Тэмүүлэнг томилохоор МАН-ын Удирдах зөвлөл ерөнхийдөө тохирчээ. Гэвч нөлөө бүхий эрхмүүд өөрийн хүн болох УИХ-ын гишүүн Бадмаанямбуугийн Бат-Эрдэнэ, Х.Болорчулуун нарыг сайдад зүтгүүлж байгаагаас эцэслэн шийдэж чадахгүй, Ерөнхий сайд дүлэгнэж суугаа аж. Эдгээрээс Эрүүл мэндийн сайд С.Энхболд доош гулган салбартаа үлдэж, эзэнгүй байгаа дэд сайдын суудалд очихоор тохиролцсон гэх. 
Ямартай ч, Л.Оюун-Эрдэнийн Засгийн газар хөдлөх нь тодорхой боллоо. Харамсалтай нь, дээрдэх бус улам дордож байгааг л хэлж чадахаар байна.