Испанийн цомын 1/8 шигшээ тоглолтод “Атлетико” баг  нэмэлт цагт “Реал Мадрид”-ыг 4:2-оор хожлоо. Тоглолт Мадрид хотын “Сивитас Метрополитано” цэнгэлдэх хүрээлэнд болжээ.

Хожсон багаас Самуэль Лино тоглолтын 39 дэх минутад, Альваро Мората 57 дахь минутад, Антуан Гризманн 100 дахь минутад, Родриго Рикельме 119 дэх минутад тус тус гоол оруулсан байна. Харин “Реал Мадрид”-ын Хоселу (82) гоолдсон бол тоглолтын эхний хагаст Атлетикогийн хаалгач Ян Облак (45+1) өөрийн хаалганд гоол оруулжээ.

“Реал Мадрид”, “Атлетико” багууд сүүлийн есөн өдрийн хугацаанд хоорондоо хоёр удаа учраа таарлаа. Нэгдүгээр сарын 10-нд хоёр баг Испанийн супер цомын хагас шигшээд хоорондоо тоглож, “Реал Мадрид” нэмэлт цагт 5:3-аар хожсон юм. Шувтаргын тоглолтод Карло Анчелоттигийн баг “Барселона” багийг 4:1-ээр хожжээ.

Өмнө нь Испанийн цомын тэмцээний 1/8 шигшээд “Барселона” “Юнионистас” багийг 3:1-ээр хожсон юм. Мөн "Севилья", "Атлетик", "Мальорка", "Селта", "Реал Сосьедад", "Жирона" багууд шөвгийн наймд шалгарлаа. Испанийн цомын тэмцээний шөвгийн наймын сугалаа өнөөдөр болно.

Энэ удаагийн цомын тэмцээний шувтаргын тоглолт дөрөвдүгээр сарын 6-нд Севилья хотын “Ла Картужа” цэнгэлдэх хүрээлэнд болно. Өнгөрсөн оны аварга “Реал Мадрид” баг цомыг нийтдээ 20 удаа хүртэж байсан бол “Барселона” баг энэ тэмцээнд хамгийн олон удаа хожил (31) авч байлаа.